« Al Jarreau - Jazz - 20 Album - Torrent Links
توطين ..!! »

معرض تصريف الكتاب الدولي

 
السلام عليكم.. لي فترة ماشيكت على المدونة مادري ليه صراحة مع انه جلستي على الكمبيوتر والنت بحدود ال 10 ساعات يوميا ..!!
يمكن لاني شخص مهمل حبتين ومتعود على تأجيل الامور كل شي اقول بكرا بكرا ويمر كم شهر وانا مكانك سر :D ويمكن لانه مافي هدف من وراء هالمدونة  ماعندي علم صراحة بس باحاول اهتم فيها اكثر
عموماً الكل سمع عن  معرض الرياض الدولي للكتاب  المقام في الرياض  انا مادري كيف يكتسب المعرض طابع الدولية مع انه كل دور النشر الي فيه عربيه ..؟؟
المعرض للاسف ما كان مثل ماينبغي
في البداية ما الهدف من وجود معارض الكتب .؟

 الهدف الحقيقي لمعارض الكتاب انها تثقف الشعب تعلم الشعب  الدولة ماراح تتطور مهما كان ومهما كانت الميزانية طول ماكان الشعب ثقافته على قده
حتى لو كان فيه الفين مدينة اقتصادية وصناعية بالبلد راح تظل مدن اسمنتية مثل ماهي جامعاتنا جامعات اسمنتية فقط ..!!
لاتتوقع من شعب نظامه التعليمي من اكثر انظمة التعليم في العالم تخلف انه يستفد من المعرض
لاتتوقع من شعب يدرس نفس المناهج من 30 سنة بدون تغيير او تطوير انه يستفيد من المعرض
لاتتوقع من طالب يستفيد من المعرض وهو  50% من مواده الدراسية مواد دينيه وللاسف يتخرج الطالب وهو مايفهم اي شي في الدين 
لاتتوقع من طالب يستفيد من المعرض وهو يدرس نظرية في الفيزياء ثبت بطلانها من 9 سنوات
لاتتوقع من طالب يستفيد من معرض وهو مناهج التاريخ تبعه محرفة
لا تتوقع من طالب يدرس في المدارس بهالبلد ويحب القراءة لأنه المناهج وأسلوب التعليم يكره الواحد في الورق كله على بعضه
انا اليوم الصباح كنت قاعد بالمكتب فاضي ماعندي شغل كالعادة :D  فقاعد أقراء لي كتاب المهم دخل علي واحد من الزملاء من فترة ماشفته سلام عليكم وعليكم السلام كيف الحال اخبار علوم وقعدنا نسولف شوي عن هالترقيات الي نسمع فيها ولا شفناها الرجال شاف الكتاب قال ورني اشوف وقلب فيه شوي وقعدنا نتكلم عن معرض الكتاب في الاخير قالي انت محظوظ قلت له وشلون ياحسرة :D قالي انت لك نفس تقرا كتاب بس انا لا قلتله انت رجال جامعي يعني دارس وتدري انه القراءة مفيدة قعد يقولي كيف كانت دراسته الجامعية وكيف كانت اساليب الدكاترة في الشرح وفي الاختبارات وكيف كان يقرا كتب ومجلدات ماتنفعه بالدراسة بس عشان الدكتور قررها ومن هالامور . انا صراحة ماجربت ولا عندي نية اجرب انشاء الله لكن كثير من طلاب الجامعات عندهم إحباط وضغوط نفسية من الدكاترة والمقررات وطرق التدريس للاسف الأمور هذي كلها لها تأثير سلبي في النفوس .
طيب ليه الناس تكره الكتب .؟؟  مثلا صاحبنا ليه كره الكتاب ..؟ الكتاب ماله علاقة الكتاب ماسوا له شي لكن السبب كان في النظام التعليمي والدكاترة الي يدرسونه فكان صاحبنا لما يدرس ويقرا الكتب يجيله ضغط ومشاعر وأحاسيس سلبية فكان وقت دراسته كل ماقعد يذاكر تجيله هالامور مع الوقت صار بمجرد مايشوف كتاب يسترجع اخر تجربة له مع الكتب فيتذكر ايام الدراسة والقلق وظيفة الصدر فيسترجع المشاعر والأحاسيس السلبية  مرة مرتين ثلاث على هالمنوال فيتبرمج على الشيء هذا فصار كل مايشوف كتاب يسترجع اخر تجربة له ويبني عليها فيصد عن الكتاب وهذا عند الناس كلها  ومو بس على الكتب على كل امور الحياة احيانا الواحد مشغل الراديو ويسمع اغنية علطول يطفيه لانها مثلا ذكرته بشخص يكرهه يحب هالاغنية او شغلة مو حلوة حصلت له وهو يسمع هالاغنية والعكس صحيح احيانا يعلي على الصوت لان الاغنية تذكره في شخص يحبه او حصل له شي حلو وقت ماكان يسمع الاغنية ..!!
انا مابي اطولها وهي قصيرة لكن حبيت ابين وجهة نظري بأنه النظام التربوي والمعلم والمناهج لهم تأثير مباشر بمستوى ثقافة الشعب وفي حبهم للقراءة من عدمه ..

طيب ليه المعرض ما نجح ..؟؟

راح اتكلم عن معرض الكتاب نفسه

المركز المنظم للمعرض مركز متخلف للاسف  مواقف قليلة للسيارات تنظيم تعبان اسلوب الترتيب والممرات يشتت الزوار كل الجهات الامنية مشتركة بالمعرض شفنا المطافي والشرطة والمرور والمجاهدين هذا وهو معرض كتاب اجل لو معرض اسلحة وش بيسوون .؟ المرور وجوده سبب ربكة وقلق بدل تنظيم السير حاس السير ..!! السكيورتي الموجودين على البوابات اسلوب تعاملهم تعبان مع الزوار وزيادة على كذا عند بوابة الخروج السكيورتي يطلبون الفواتير .. المشكلة ليتهم يدققون كان قلنا مو مشكلة  وجودهم سبب ربكة واستحقار للزوار صراحة الي يشوف اسلوبهم يقول هذا معرض نشل مو كتاب ..  مدة المعرض القصيرة 10 ايام ماتكفي ..  واسلوب توزيع فترات الزيارات التعبان  الاوقات الي فيها امكانية زيارة النساء كانت كلها صباحية والناس دوامات يعني مافيه الا خميس وجمعة  وهذا سوا زحمة بالمعرض  صراحة اكبر غلط انهم يخصصون اوقات لزيارة الرجال وبقية الاوقات للجميع .. طيب معروف انه نصف القراء او اكثر من النساء ليه ماكان فيه اوقات خاصة لهم ..؟؟ لو كان الامر بيدي كان تركت فترات الزيارة كلها مختلطة ومافيه شي اسمه رجال او نساء او عوائل لكن بما انه الدعوة فيها عنصرية يحطون فترة للنساء ويريحون ويرتاحون .. اما  الشباب هالي جاييين من تحفيظ القران ولابسين بشوت ومسوين فيها هيئة  شي ثاني :D  والله ناس ماتستحي الحين يطل في وجه البنت ويقول لها عينك عينك :D  طيب غض البصر جزاك الله خير بالاول بعدين انصح الناس ..!!  بالنسبة للاسعار فضحك على الذقون الاسعار صراحة غالية ومافيها اي تخفيض واغلب دور النشر جابت الطبعات القديمة والكتب الي مالها سوق تعرضها بالمعرض  بالعقل  هل فيه رواية طبعة 1990 سوء التخزين اثر في الوان الصفحات والغلاف تباع في معرض الكتاب باغلى من سعرها الاصلي ..!! المفروض من المعرض انه يساعد على انتشار الكتب المفروض يكون فيه تخفيضات حقيقية او دعم حكومي على الاقل بما انه الميزانية رايحة على مشاريع مامنها فايدة خل يستفيد منها الشعب في شي مباشر على الاقل .. وبعدين فيه كتب كثيرة ممنوعة يعني على حسب ماقريت بالجريدة انه مافيه شي ممنوع وفعلا حصلت اشياء ممنوعة مدخلينها بس للاسف كانت اشياء تافهة يعني شفنا كم رواية ممنوعة بس اغلبها روايات تافهة وجنسية انا مو ضد الادب الجنسي بالعكس فيه اشياء كثيرة حلوة ومفيدة من ناحية التنوع لكن فيه اشياء فعلا شاذة يعني من نوع خالف تعرف  ومايكتبها الا شخص منتهي اصلا :D

بالاخير  مادري وش اقول التنظيم  التعبان حارق دمي صراحة لانه كان الهدف من المعرض هالة إعلامية وتسويق بعض الكتب وغيره مامنه اي فايدة  فقط مجمع مكتبات ..!!
على كل حال اشتريت مجموعة كتب وروايات والله يعينني على قرائتها … :)
 
 
 

هذه التدوينة ادرجت بتاريخ 11 مارس 2007 في الساعة 2:54 م ضمن تصنيف كـتـب. يمكنك متابعة أي تعليق من خلال RSS 2.0 خلاصات التعليقات. يمكنك ترك تعليق, أو تعقيب من خلال موقعك الشخصي.

التعليقات 2 على “معرض تصريف الكتاب الدولي”

  1. The Doctor SAUDI ARABIA علق:
    مارس 12th, 2007 في الساعة 4:26 ص أقـتبـاس

    مرحبا بعودتك إلى مدونتك :)

    أتمنى لك الاستمتاع بغنيمتك الفكرية الغنية ما شاء الله

    أظن أننا لا نستطيع إلقاء اللوم في كره الكتاب و القراءة بالكامل على المجتمع و النظام التعليمي، ففي رأيي، أنه ما دام الشخص بالغا عاقلا، فهو المسؤول أولا و أخيرا عن تصرفاته و عاداته.

  2. Be-Smart SAUDI ARABIA علق:
    مارس 14th, 2007 في الساعة 7:10 ص أقـتبـاس

    اهلا سعادة الدكتورة ..

    شوفي ياطويلة العمر .. انا ما اقول انه الشخص مو مسؤول عن نتيجة اهماله كل شخص تقع عليه المسؤولية الكاملة اتجاه تصرفاته لكن الكل يعرف انه ” من شب على شيء شاب عليه ”
    فيه حديث عن الرسول انا ماعرفه نصاً لكن بما معناه ” كل انسان يولد على الفطرة فوالداه اما يهودانه او ينصرانه او يمجسانه ” يعني الدين وهو اساس الحياة ممكن يتغير فقط من خلال الوالدين فكيف الثقافة وحب القراءة وهالامور الواحد من ينولد ويكبر ويدرس ويصير عمره فوق العشرين وهو على اسلوب معين صعب جداً يتغير ..!!

    عشان كذا مازلت اعتقد انه نظام التعليم سبب اساسي في عدم ثقافة الشعب ..!!

أضف تعليقاً

-حقنة -صحيح -وراه -ادائك غير مرضي -المطاوعة وصلوا -يابختك -ياحسافة -طربان -مايندرى عنك -افكر واردلك خبر -لالالا -وردة حبنا -شريطي -كش عليك -ودي اصدقك بس قوية -يواد ياحليوة -ماعاد الا هو بعد -اخ ياقلبي -اتوكو -مطوع -ين يانج -ايه هين -مشتهي ومستحي -دينزل واشنطن -احرجتن -السم الهاري -فك وافك -لو اصيدك بس م11 -وش انت مسوي -يبيلك طق -ذيب

*
To prove you're a person (not a spam script), type the security word shown in the picture. Click on the picture to hear an audio file of the word.
Click to hear an audio file of the anti-spam word